又發瘟

最近有雞檔發現有H5N1雞瘟，結果又引發一場雞隻大屠殺，睇住食環署啲人將啲雞好似垃圾咁一隻一隻咁殺死，然後掉入垃圾袋，其實幾心寒。

雞，喺呢個情景之下，就好似垃圾一樣，無人會視雞係一種生命。

就因為唔想有人死，結果就開始咗一場殘忍嘅大屠殺。

以前啲人成日話，大菌食細菌，細菌當無菌，以前無咁多殺人病毒，唔知點解而家成日好多菌會死人。我識一個大叔，佢雖然唔算話好有錢，但都未至於窮到無飯開，但就唔知點解好鍾意執垃圾，佢喺垃圾筒執到嘢食都夠膽食，聽人講佢有呢個習慣已經好耐，話極都唔聽，但唔知點解食垃圾咁耐都食唔死。

點解會咁？成日講健康飲食嘅人小小嘢就中毒，一個成日執垃圾食嘅人反而食極唔死。

我諗，對於所謂「健康飲食」，需要有一個新嘅定義，唔係話計你乾唔乾淨，有幾多細菌，而係計啲食物會唔會削弱身體某啲天生對抗疾病嘅機能，我開始覺得基因改造食物，達到「完全潔淨」，「完全潔淨」呢樣嘢，對人類可能真係一樣毒害。